يتحدث اعلام المريخ عن المنتخب الوطني وعن اختيار عناصر اكثر من الهلال للمنتخب ، متناسون ان الهلال الاكثر استقرارا واحترافية ونظاما وانضباطا حيث يعاني المريخ الآن حتى في الملعب الذي يمكن ان يلعب او يتمرن عليه ..ويعيش المريخ اوضاع (ادارية) غير مستقرة جعلت النزاع بين اهل المريخ يصل الى الشرطة وتظهر فيه السكاكين والسواطير.
· غايتو نادي الحركة الوطنية دا اصلو ما في زيو.
· المريخ حقق بطولة الدوري الممتاز في المواسم الثلاثة الماضية – لكن كلنا نعرف كيف حقق المريخ هذه البطولات ..بطولة تحققت بعد انسحاب الهلال من المنافسة التى اغتيلت عدالتها والهلال كان يتصدر بفارق (9) نقاط من المريخ ، وبطولة يسأل عنها الكاردينال بعد خصم (6) نقاط من رصيد الهلال بسبب عقوبة الفيفا على الهلال.
· تاني فاضل شنو؟
· اعلام المريخ نفسه عندما يتحدث عن ادم سوداكال يخصم هذه البطولات من انجازات سوداكال في المريخ باعتبارها بطولات حققت خارج الملعب …وادم سوداكال نفسه ينظر الى الاجهزة الفنية واللاعبين الذين تحققت هذه البطولات في فترتهم بأنهم لا يستحقوا التحفيز والتبجيل لأن البطولات لم تحقق في الملعب.
· في اخبار الاتحاد الافريقي ان الكاف وضع اسم الهلال ضمن اسماء الاندية التى يمكن ان تشارك في بطولة السوبر الافريقي.
· لهذا تبقى المقارنة بين الهلال والمريخ معدومة – ويبقى من الطبيعي ان يتم اختيار اكبر عدد من لاعبي الهلال للمنتخب.
· ملاحظة اخرى تأتي في صالح الهلال وهو ان الهلال يوجد فيه محترف واحد يشارك مع الهلال في المباريات وهو اللاعب اوتارا الذي ابعدته الاصابة في الفترة الاخيرة لتكون كلية الهلال وتشكيلته كلها عناصر (وطنية) بينما يوجد في المريخ ثلاثة محترفين ..يشارك منهم لاعب بصورة مستمرة ويشارك اثنين منهم بصورة متقطعة.
· بعض كتابات اعلام المريخ غير (المهنية) تتحدث عن اختيار عناصر في الهلال لا تشارك بصورة مستمرة مع الهلال …وهذه رؤية لا يتحدث عنها اعلام المريخ غير (المهني) إلّا في الهلال ..لأن اختيار عناصر لا تشارك مع انديتها في المنتخب السوداني يبقى امر عادي وطبيعي في سياسة المنتخب الوطني.
· المنتخب الوطني ظل يختار اللاعب حسين الجريف حتى بعد ان شطبه الهلال من كشوفاته واستغنى عنه …وكان حسين الجريف بدون نادي لمدة (6) اشهر مع ذلك كان الجهاز الفني للمنتخب يختاره بصورة مستمرة في كلية المنتخب.
· الغريب في الامر ان الجهاز الفني للمنتخب يختار عناصر من المريخ هي الاخرى لا تشارك مع المريخ بصورة مستمرة مثل اللاعب التاج يعقوب ومثل الحارس منجد النيل الذي لا يشارك نهائيا مع المريخ.
· اغرب من هذا ان رمضان عجب شارك مع المنتخب وهو يلعب امام منتخب غانا وهو موقوف من قبل الاتحاد نفسه ولا يشارك مع ناديه منذ الموسم الماضي.
· مع ذلك عندما يختار الجهاز الفني لاعبا من الهلال لا يشارك بصورة اساسية في مباريات الهلال تقوم الدنيا ولا تقعد.
· الناس ديل عندهم الاحساس بـ (المؤامرة) عالي.
· اتركوا كل هذا وتعالوا شوفوا الاتحاد العام وحسن برقو الذي يهاجمه اعلام المريخ غير (المهني).
· مع المريخ وفي البطولة الافريقية اصيب اللاعب (التش) بقطع في الرباط الصليبي وخشونة في غضروف الركبة نسأل الله له السلامة …وهي اصابة خطيرة انهت موسم اللاعب وأبعدته من المشاركة.
· الاتحاد العام وحسن برقو شخصيا تكفل بعلاج هذا اللاعب في اضخم وأفضل مشفى لمثل هذه الاصابات في العالم وقام الاتحاد وحسن برقو تحديدا بمخاطبة الاتحاد القطري لاستقبال اللاعب ومعالجته وتأهيله في فترة قاربت الآن من الشهر الرابع.
· وحتى لا اجهض حقوق اخرين وهذا شيء لا افضله ولا يحدث مني إلّا سهوا او غفلة او خطأ لا اتعمد فيه …اتوقف عند الدور الذي قامت به رابطة المريخ في قطر والعمل الكبير الذي يقوم به مولانا مجذوب المجذوب رئيس رابطة المريخ في قطر ..ليس للمنتميين للمريخ فقط وإنما لكل السودانيين… وهذا امر ليس غريب على ابن مدينة شندي مجذوب (المحبوب) وليس مجذوب (المجذوب).
· رابطة المريخ في قطر لعبت الدور كله في علاج الغربال عندما كان في المريخ وفي علاج ضياء الدين …هذا امر يحسب لهم.
· نقول ذلك حتى لا نسقط افضال الناس وأدوارهم الجميلة ..لكن ما يجب ان نقف عنده ان كل هذه الامور تمت بتحرك الاتحاد السوداني وبمخاطبته لنظيره القطري.. دون ان ننقص من دور مجذوب المحبوب له كل الشكر والتقدير.
اعلام المريخ وجمهوره الذي يغيب عن هذه الامور نسى دور لاتحاد الكرة السوداني في علاج التش وظل يكيل اللوم والسباب لاتحاد الكرة ويعتبر ان الاتحاد يفرّق في تعاملاته بين الهلال والمريخ.
· ازيدكم من الشعر بيت …مع المنتخب الوطني اصيب لاعب الهلال ياسر مزمل وتعرض لإصابة في الرباط الصليبي …مع هذا رفض الاتحاد العام معالجة اللاعب او التعامل معه بنفس الطريقة التى تعامل معها مع التش ليغادر ياسر مزمل على نفقات الهلال وهو وقتها خارج كشوفات الهلال (شفتوا عظمة صاحب المقام الرفيع) ويجري عملية جراحية بمستشفى في القاهرة درجة ثانية مقارنة بالمستشفى الذي يتعالج فيها التش في قطر الآن ويتم تأهيله برؤية طبية وعلمية دقيقة.
· اتركوا كل هذا – الاتحاد العام الآن يشرف على علاج اللاعب عمر صالون واللاعب اكرم الهادي سليم في القاهرة نسأل الله لهما السلامة والعافية ويقدم لهما الدعم والذي نعتبره واجبا على الاتحاد وفرضا عليه.
· لكن نفس هذا الاتحاد رفض النظر الي ياسر مزمل ولم يشارك او يساهم في علاجه بدولار واحد ..رغم ان ياسر مزمل كان اساسيا في المنتخب الوطني قبل تعرضه للإصابة …وينتظره مدرب المنتخب الفرنسي فيلود الآن بفارق الصبر ليستفيد من امكانياته العالية رغم انهم لم يشاركوا في علاجه بـ (شلن) يوغندي او (بير) اثيوبي.
· اعلام المريخ المنزوع منه (الوطنية) والخالي من (المهنية) والذي يطلق على على اعلام الهلال (اعلام الضلال) ويرفض ان نصفهم بما فيهم …عندما تدخلت الشرطة في اعمال الجمعية العمومية للمريخ في 27 مارس بسبب الاوضاع الصحية التى كانت تمر بها البلاد …اعتبروا تدخل (الشرطة) في اشياء من صميم واجباتها مخالفا لأهلية الحركة الرياضية …كتبوا وهددوا ..وأرغوا وأزبدوا..وتحدثوا عن (البمبان) وعن التدخل السافر للشرطة لفض تجمع ترفضه السلطات الصحية وتحذر من قيامه.
· نفس هذه (الشرطة) التى هاجموها في القيام باختصاصاتها .. لجأوا اليها وهرلوا نحوها لاستلام نادي المريخ واستاده بالقوة الشرطية.
· رفضوا البمبان في حديقة الموردة .. ورحبوا بالأسلحة والذخيرة الحية في نادي المريخ وفي استاده.
· هل يمكن ان يقابلكم تناقض بهذه الدرجة؟
· نحن لا نقول ان تدخل الشرطة هنا غير قانوني …ولا نهاجمها ..ولكن نتحدث عن اختلاف المعايير عند اعلام المريخ من موقف لأخر يقوم على نفس المقومات التى رفضها اعلام المريخ في البدء.
· ادم سوداكال الآن يعتبر ان تدخل الشرطة مرفوض وهو خاطب الفيفا بهذا التدخل الذي يعتبره تجاوزا وتدخل من طرف ثالث . ..علما ان سوداكال هو الاخر كان قد لجأ للشرطة وخاطبها لفض جمعية المريخ العمومية في 27 مارس.
· والله نادي الخريجين الاوائل دا اصلو ما في زيو؟
· أي زول بيلعب لصالح ورقه في المريخ.
· واي زول شايف نفسو ..هو الصاح…والطرف التاني هو الغلطان.
· نفس الموقف الذي يمكن ان تكون معه ..يمكن ان تكون ضده اذا كانت مصالحك تجبرك على هذا.
· عندما اسمع الدكتور مدثر خيري ..اقول الناس ديل مية المية ..شغالين بالقانون ..ولمن اشوف علي اسد استعجب.
· واعلام المريخ يقدم الاخبار ويغطي الاحداث باللونية التى يريدها ويفضلها.
· والله ما في أي (مهنية).
· ولا حتى ذرة من المهنية…ناهيك عن المهنية كلها.
· حتى المواقع الحمراء تغطي الاخبار وهي منزوع منها (المهنية).
· ومع ذلك يتشدقوا ليك في الفارغة والمليانة ..ويدعون غير ما يعملون…ويطلعوا ليك في البتسوى والما بتسوى.
· قوموا لفوا عليكم الله.
· حكايتكم دي زي قراية الطب بالمسا.
· مرة عندنا قريبنا اسمه (كربح السمح) …مشى ليه لي دكتور في الحلة …وهو عارف ان هذا الدكتور دخل الطب بعد ان امتحن الشهادة السودانية (7) مرات …وقرأ طب عن طريق قراية المسا.
· الدكتور دا ..كتب لي قريبنا (كربح السمح) (ملوة) روشتات…ما خلي ليه حاجة …ادوية تفتح ليها صيدلية.
· قريبنا (كربح السمح) عاين للروشتات كدا ..وقال للدكتور ..انت كان قريت كل هذه الروشتات ..ما كان قريت الطب بالمسا.
· عليكم الله ما تقولوا لي (كربح السمح) دا منو؟
· هسع جماعتنا ديل بتسمع منهم نظريات وبتشوف روشتات …والفيفا قالت واللوائح ..والنظام الاساسي والمادة 14 ج تخليك تقول الناس ديل لو بعرفوا الكلام دا كلو …ما كان وصلّوا المريخ لهذه المرحلة.
· وما كان الموضوع جاب ليه سواطير وسكاكين.
· اللوائح فيها سكاكين؟
· الفيفا عندها سواطير؟
· هلال الملايين فرق.
· ……….
متاريس
· اكتب قبل مباراة الاهلي شندي والمريخ …واتمنى ان تكون المباراة قامت ..واكتملت …من غير أي صراعات او اضرار او اصابات في الجانب البشري.
· لا نريد لجمهور المريخ ان يدخل لهذا النفق.
· ابعدوا الجمهور من هذا الصراع.
· الشرطة استلمت النادي.
· واستلمت الملعب.
· الفريق كيف؟
· الله يستر كيف؟
· مدرب المريخ مفروض يكون (عقيد) في الشرطة …ومدير الكورة يفترض يكون (رائد).
· الباك اليمين مفروض يكون (رقيب).
· والكابتن (صول).
· والزول البجيب الكورة وراء القون (مستجد).
· المريخ بقى نادي (الشرطة).
· والله الحاجات دي في نادي الشرطة …الشرطة القضارف ذاتها ما قاعدين نشوفها.
· قالوا ليك تشكيلة المريخ بقى يضعها (فريق) معاش.
· المريخ ذاتو بقى (فريق) شرطة..نادي المريخ العاصمي.
· الشيء الغريب ..ناس المريخ بي حالتهم دي..مرة طلّعوا (الشرطة) من الملعب ..وقالوا ما بكملوا المباراة إلّا اذا الشرطة طلعت من الملعب …في الاحداث الشهيرة التى كانت في المباراة التى جمعت بين المريخ والمريخ الفاشر.
· هسع الشرطة بقت ليكم حلوة؟
· نرجع للأرشيف ..وإلّا ما في داعي؟
· خلوها مستورة احسن.
· …………..
· ترس اخير : لو الكاردينال موجود في الهلال ..كان انسحب من الدوري في الظروف دي .. وقال ما بيلعب واهدي البطولة للمريخ.
