عندكم (الشيخ) ماشيين (كاس) ليه؟
عندكم الشيخ ماشين كأس لسه ؟؟؟؟؟
·عند صلاح احمد ابراهيم وهو احد ابرز الذين اسسوا (دبلوماسية) خاصة للعواطف ، وأوضح من جعل للحب (سفارات) و (قنصليات) في الدواخل ليصل التمثيل العاطفي الى اعلى معدل تمثيل له بين المحبين بسبب قصائده وكلماته . هذه الكلمات اعتبرها انضر ما كتب في قصائد الغزل – ليس على مستوى السودان ، وإنما على مستوى الوطن العربي منذ ادبه الجاهلي وحتى ادبه الحديث الحالي.
· يقول صلاح احمد ابراهيم:
يا مرية :
ليت لي ازميل ” فدياس وروحا عبقرية وأمامي تل مرمر”
لنحت الفتنة الهوجاء في نفس مقاييسك – تمثالا مكبّر
· وأنا اقول بعد ان شهدت هدف الشيخ محمد (شيخو) في شباك المريخ – ليت لي ازميل ” فدياس وروحا عبقرية وأمامي تل مرمر” لأكتب عن هذا الهدف كما كنت افعل مع اهداف الوالي الغالي ، بعد ان ذكرني هدف شيخو بأغنيات بادي محمد الطيب التى يصل فى بعض مقاطعها لدرجة من الانصهار والطرب يصرخ فيها بادي محمد الطيب.
· قريبنا قال لي هدف الشيخ دا الواحد يستاهل يطلع ليه (الخلا) ..يصرخ ويرجع البيت من غير ما يشعر بيه زول.
· بالمناسبة من اجمل الاصوات الغنائية في السودان صوت بادي محمد الطيب وهو من الاصوات التى تسمعها عن طريق (الوريد).
· يحقن صوته في (عروقك) وتجرى حروفه في (الدم) – وتبقى متل الزول القاعد وما قاعد …الواقف وما واقف ..النائم وما نائم.
· بين …بين.
· الشيخ محمد سجل له هدف في شباك محمد المصطفى ، على ما اعتقد ان حارس المريخ طار على ارتفاع 35 الف قدم فوق سطح (نجيل) ملعب الخرطوم الصناعي وجاء واقع.
· وقام ووقع.
· وصنقر.
· ومرنقبو قربنبو.
· وحاجة بالشكل دا – لتضرب (الكرة) في يده…وتدخل في مرمى المريخ.
· أنا رأسي لفه …ما عارف صلاح نمر حصل عليه شنو؟
· الفحوصات الاولية لمحمد مصطفى بعد هدف (شيخو) بتأكد ان حارس المريخ انداح …وجدع ايدو ..ودخل في هذه الحالة التى كتب عنها العبقري محمد المهدي المجذوب في (ليلة المولد يا سر الليالي) حينما قال :
وهنا حلقة (شيخ) يرجحن…
يضرب النوبة ضربا فتئن وترن
ثم ترقص هديراً أو تجن
· يضرب (الكرة) ضربا فتئن وترن.
· أنا من قبيل اقول (يرجحن) دي لاقتني وين؟
· شفتها وين؟
· كتبت سنوات في الصحافة …عاوز لي طريقة ادخل بيها (يرجحن) دي في جملة مفيدة ما لقيت.
· قدر ما فتشت..واتحرفنت .ما لقيت لي طريقة…إلّا لمن شفت هدف شيخو.
· الآن اؤكد انه ما في موضع لاستعمال هذه الكلمة انسب من هذا المقام…لأكتب (يرجحن) بعد هدف الشيخ في حارس المريخ محمد المصطفى.
· اها دي يا مزمل ابوالقاسم برضو ح ترجع ليها للأرشيف.
· دي ما بتلقاها في اللوائح.
· ما بتلقاها في الكاف والفيفا.
· عشان ما تتعب كتير (فتئن وترن) دي ما بتلقاها إلّا في حالة محمد المصطفى حارس المريخ.
· (رجحنة) زي دي انا اصلي ما شفتها.
· دي يا مزمل ادخل ليها اليويتوب عديل ..وشوف هدف الشيخ.
· يا الغربال حارس شباكه مفتوحة 5 ضلف زي دي بتفوتوه كيف؟
· يمين أنا القي حارس زي دا اطلع هداف الدوري من مباراة واحدة.
· رجعّوا منجد النيل.
· شوفوا (النجدة).
· اطلبوا (النجدة).
· حالتكم صعبة لكن!!
· انتوا قايلين حالة صلاح نمر وحمزة داؤود وامير كمال وبخيت خميس (ابو 3 مليار ونص) ما ظهرت في هذا الهدف.
· والله حالتهم ظهرت زي (نتيجة) الفحص.
· واضحة وما بتغالطوا فيها اتنين.
· ولا عاوزة ليها درس عصر.
· ديل ناس امير كمال وصلاح نمر ..وحمزة داؤود وبخيت خميس (ابو 3 مليار ونص):
وحواليها طبول صارخات في الغبار
حولها الحلقة ماجت في مدار
نقزت ملء الليالي …
تحت رايات طوال
كسفين ذي سوار…
في عباب كالجبال
وتدانت أنفس القوم عناقاً واصطفاقاً ..
وتساقوا نشوة طابت مذاقاً
· الما شاف الهدف ..يشوف الكلام دا :
ومكان الأرجل الولهى طيور…
في الجلابيب تثور.. وتدور
تتهاوى في شراك
· والله العبقري محمد المهدي المجذوب ..كأنه بكتب عن هدف الشيخ في مرمى المريخ.
· هسع الكلام دا …امانة فيكم ما شفتوه في قناة الملاعب :
ثم تستنفر جرحي وتلوب في الشباك
مثلما شب لهيب
وعلا فوق صدى الطبل الكرير.
.كل جسم، جدول فيه خرير …
ومشى في حلقة الذكر فتور
لحظة يذهل فيها الجسم والروح تنير
· ديل ناس صلاح نمر ساكت.
· الحاجة الما وقعت لي ..وما لقيت ليها تفسير …انت يا بخيت خميس …الناس شالوا 15 مليار …و18 مليار …والحكاية وصلت لغاية 28 مليار …ناس عجب والرشيد …انت الجابرك على 3 مليار ونص شنو؟
· الجابرك على البهدلة دي ايه؟
· 3 مليار ونص شوية على البهدلة دي.
· بهدلتك دي بهدلة زول دفعو ليه 45 مليار.
· والله نحن لو عارفين كدا …لو دا مستواهم ..ولا بنمشي (كاس).
· تعب في الفاضي.
· يا الطاهر يونس ما تزعل.
· يا الفاضل التوم ما تختلفوا.
· ما تمشوا (كاس).
· امشوا للشيخ.
· الشيخ بحلها ليكم.
· موش مرات بقولوا ليك المرض دا ما مرض (دكاترة).
· المرض دا مرض (شيوخ).
· يعني علاجو عند (الشيخ).
· هسع قضيتكم دي ..ما قضية قوانين.
· القضية دي قضية (الشيخ).
· ودوا ليه (الملف)..وحمزة داؤود وأمير كمال وبخيت خميس (ابو 3 مليار ونص).
· مع قروشك دي يا بخيت خميس مفروض عكستك ما توصلها خط 18.
· اعكس ليهم كورتهم قدر قروشهم.
· تعبان فوق كم؟
· يا لجنة تطبيع الهلال خلونا ..نمشي للشيخ في الخرطوم الوطني ..يا كمان جيبوا لينا الشيخ في الهلال.
· نحن اصلو ما بنقعد.
· نحن اصلو ما بنسكت.
· الموضوع دا ما عاوز ليه محامي برتغالي.
· محامي برتغالي في شنو؟
· والله عند الشيخ في 3 ثواني يحسمو ليكم.
· نحن اهداف زي دي من زمن مهند الطاهر تاني ما شفناها.
· وقت عندكم (شيخ) زي دا – المحترفين لزومهم شنو؟
· المحامي البرتغالي ليه؟
· يا جماعة الكلام دا ما قلتوا انا ..دا قالوا العبقري محمد المهدي المجذوب ..عشان بكرة مزمل ما ينط لينا.
عيون الشيخ أُغمضن على كون به حلم كبير
والمقدم
يتغنى يرفع الصوت عليا …
وتقدم …يقرع الطبل الحميا
ورم الذكر وزمزم …
واستقامت حلقته وانحنت حين انحنى
وهوت والطبل نار تتضرم
وتصدى ولد الشيخ وترجم
حيث للقطب حضور …وتداعَى وتهدم
وينادي منشد شيخاً هو التمساح..
يحمي عرشه المضفور من موج الدميرة
ندبوه للملمات الخطيرة …
شاعر أوحى له شيخ الطريقة
· والله محمد المهدي المجذوب ما فاضل ليه إلّا يقول ليكم الشيخ محمد صاحب الرقم (14)…هو (شيخ الطريقة).
· نحن تاني لا عاوزين عزام عادل ..ولا التش.
· نعمل بيهم شنو؟
· ناس المنتخب ..فيلود ..وخالد بخيت ..بشوفوا في البعمل فيه الشيخ دا؟ …وإلّا قناة الملاعب ما عندهم.
· امير كمال شغال (ضرب) في الشيخ و(رفس) و(خبط) وبرضو ما فهم حاجة ..طلع من المصابين.
· صلاح نمر وبخيت خميس فى عداد المفقودين.
· اما حمزة داؤود فان نصيحتنا ليه .. يراجع (الركب)…ويعالج (الغضروف).
· الشيء دا لو ما ظهر ليك هسع ..بظهر ليك قدام.
· جلابية العيد طلعت قبل اسبوع.
· دا اسرع (ترزي) اشوفو في حياتي.
· يسلمك الجلابية قبل ما تسلمو القماش..دي ما شفتها إلّا عند (بيرم)….وابوياسر للجلابية رحمة الله عليه.
· هسع عليكم الله دا ما الشيخ ولدنا ذاتو :
زاهد قد جعل الزهد غِنى
فله من رقع الجبة الوانا حديقه
والعصا فى غربة الدنيا رفيقه
وله من سبحة اللالوب عقد
ومن الحيران جند
وله طاقية ذات قرون
نهضت فوق جبين
واسع رققه ضوء اليقين
· خلوني انا..عشان ما تقولوا قاعد اشرع ليكم – والله انا فترت ..جبتوا لي (فلايت) من الكلام الكتير.
· الحالة دي ما حالة هدف الشيخ في المريخ.
· شوفوا الشيخ واحتفاله ..وانظروا الى محمد المصطفى والعتاب واللوم والتقريح الذي تعرض له من زملائه.
وفتى فى حلبة الطار تثنى
وتأنى
وبيمناه عصاه تتحنى
لعبا حركة المداح غنى
راجع الخطوة بطار
رجع الشوق وحنّا
وحواليه المحبون يشيلون صلاة وسلاما
ويذوبون هياما
ويهزون العصيا
ويصيحون به أبشر
لقد نلت المراما
· التثني والتأني هذا ما حدث لمحمد مصطفى …طاير في الفاضي…والمحبون حول الشيخ ..ناس كسرة وزياب يوسف والتوزة.
· الصلاة على النبي…انا تاني مفروض ما اقول ليكم شيء…مفروض امشى البيت على كدا.
· شهر تاني ما بكتب ليكم حرف.
· اقول شنو بعد هدف الشيخ دا؟
· عندنا مريخابي قريبنا ..كمل ليه في الهدف دا (صندوق بندول)…ومشى على الصيدلية يشوف حبوب الضغط.
· وعندنا (مروحة) في البيت …7 سنوات ما اشتغلت.
· بعد الشيخ جاب هدفو ..اشتغلت.
· دورت براها.
· الغريبة دورت من غير كهربة.
· عارف الحتة دي ما بتقع لي مزمل ابوالقاسم ..بقوم يغالط فيها.
· في اجنبي قال قدر ما قالوا ليه عن جمال السودان ما صدق.
· قدر ما حكوا ليه ما اقتنع.
· جبل توتال.
· ومقرن النيلين. وجبل مرة.
· اصلو ما اقتنع.
· إلّا لمن شاف هدف (شيخو)…ِشوفوا الفرح دا كيف؟
وهنا فى الجانب الآخر أضواء رقاق
نشرت قوس قزح
من رجاء وفرح
من ربيع فى دحى الليل يراق
ونساق
أنفس شتى وبطء واستباق
· والله نحن لو عارفين اعارة (الشيخ) بتعمل كدا…كنا اعرنا مع الشيخ بشه.
· خايف الطاهر يونس ..يصدق ..يقوم يطلع يقول انا قاصدها.
· نحن اعرناه مخصوص عشان يجيب الهدف دا.
· والله انتوا شفوت.
· انتوا ما نصيحين.
· اول مرة دي تحصل.
الغربال ..يمر من امير كمال وصلاح نمر وحمزة داؤود في مباراة القمة بين الهلال والمريخ والشيخ يسجل الهدف في مباراة المريخ والخرطوم الوطني.
· دي ما حصلت قبل كدا في كورة.
· بصمة البرتغالي ريكاردو في الخرطوم الوطني ظهرت.
· محمد المصطفى يشوتوها فيه من الجوهرة الزرقاء …تدخل فيه في استاد الخرطوم.
· يا زول.
· قلت ليكم.
· الشيخ سرو باتع.
· ولا كلمة.
· ابراهومة جاب الشيخ.
· دربو.
· وما قصر معاه.
· واتصور برفقته.
· الشيخ عاوز يشيل ابراهومة هسع من المريخ.
· لك الحمد اولا واخيرا.
· لك الفضل كله.
· والثناء.
· والشكر.
· ربنا احفظ نعمة صدارة الهلال من الزوال …وابقى عليها ..وخلي الفارق في كل مباراة يتسع لصالح الهلال.
رب فى موطنى المسلم قد عدنا إليكا
ما اعتمدنا ربنا إلا عليكا
وذكرنا الهادى المختار ذكرى
ملأت أرواحنا طهرا وصبرا
صل يا رب عليه
وتجاوز عن ذنوبى وأغفرِ
وأعنى بمتاب أكبرِ
· هدف الشيخ دا ذكرني ليك بي قصة…زمان نحن وقت كنا طلبة في المدرسة ..كنا ما بنحب الحفظ.
· ولا بنحفظ لينا قصيدة.
· كنا بنحفظ بس اغاني وردي وعثمان حسين.
· مرة جابوا لينا استاذ لغة عربية صعب.
· اول حصة دخل علينا الفصل ..عشان يثبت شخصيته ..ويورينا العين الحمراء ..قال لينا أي زول ما (حافظ) يقوم على حيلو.
· الفصل كله وقف ..إلّا طالبين اتنين.
· الاستاذ اتبسط ..شال كتاب المحفوظات ومشى عليهم ..وقف قدام الاول قال ليه انت (حافظ) شنو؟
· الطالب قال ليه (حافظ عبدالله) يا استاذ.
· الاستاذ بطنو طمت.
· مشى وقف قدام التاني وقال ليه وانت؟
· التاني قال ليه (حافظ عبدالكريم) يا استاذ.
· الاستاذ طلع من الفصل لغاية الليلة ما رجع.
· وفي ناس قالوا ترك التدريس ..وشاف ليه شغلة تانية.
· انت يا محمد المصطفى ..حالتك دي ما تنتظر بها مباراة القمة.
· احسن اتخارج من بدري.
· ناس صلاح نمر ديل ما بنستروا.
· ناس الغربال وياسر مزمل ديل ..الايامات دي (جانلويجي دوناروما) عندهم فوقو رأي.
· ……….
متاريس
· يا ناس الهلال عاوز اقول ليكم كلام ..ابقوا عليه عشرة.
· يا لجنة التطبيع.
· اتحركوا واحسموا هذا الملف.
· في الخرطوم الوطني لاعب محور اسمه (زرياب يوسف) او (زرياب القوز) بيشبه الهلال.
· لاعب صغير في السن ..وطويل القامة …وكله حركة ..في أي حتى تلقاه.
· ترجعوا (الشيخ) من الخرطوم الوطني وتسجلوا منهم زرياب يوسف …ما عاوزين منكم تاني أي شيء.
· زرياب لعاب.
· اسمعوا الكلام دا.
· واتحركوا.
· واحسموا من بدري.
· ما تضيعوا مننا مواهب الخرطوم الوطني.
· جيبوا لينا زرياب يوسف.
· عبدالمهيمن الامين ..اخطر رجل تسجيلات في السودان ..كان قد بدأ مفاوضات مع هذا اللاعب وهو في القوز.
· لكن ناس الهلال قاعدين يتجرجروا.
· احسمو تسجيلاتكم.
· لاعب (حركة) زي دا ما بتلقوه.
· نشاط ومهارة.
· واي حاجة في كرة القدم.
· قول زي ما عاوز تقول زي ما بقول المعلق المصري ايمن الكاشف.
· البطولة الافريقية سوف تبدأ في سبتمبر القادم.
· يعني بعد اقل من شهرين.
· احسموا تسجيلاتكم.
· يا السوباط اتحرك.
· الموضوع دا ما تخيله لي بكرة.
· الكلام دا لو طلع من هنا ..بيبقى صعب عليكم.
· بتتعبوا.
· كلمتكم انا.
· معتز التوزة برضو لاعب مع ساهل …وزول لعاب …وعنده شخصية في الملعب.
· اكتب قبل مباراة الهلال والشرطة ..واسأل الله ان يكون الهلال حسمها بسهولة.
· اكتب قبل المباراة وانا اقصد ذلك.
· هذا العمود مخصص كله للشيخ.
· مباراة الهلال والشرطة برجع ليها بكرة.
· بكرة ان شاءالله نشوف ناس الغربال والشعلة وياسر مزمل عملوا شنو؟
· بكرة بنرجع لي ناس عبدالرؤوف.
· الليلة المساحة دي كلها حقت الشيخ.
· الشيخ وزرياب.
· الهلال في التسجيلات القادمة في جانب الوطنيين ما عاوزين كتير.
· عاوزين الشيخ يرجع.
· وزرياب.
· وحارس الاهلي شندي اسحاق..ولاعب الميرغني كسلا عبدالصمد المنن.
· ومعتز التوزة.
· واكيد التأهيلي والوسيط والدوريات في الخرطوم يكون فيه موهبة او اتنين.
· التسجيلات مهمة.
· ما ح نصل الى الكمال وما ح يبقى الهلال بدرا إلّا من خلال اضافات نوعية في كل فترة تسجيلات.
· أي موهبة جيبوها الهلال.
· بعد دا ..لو ناس عجب والرشيد رجعوا للهلال ما عندهم طريقة.
· ما في خانة فاضية ليهم.
· في ظل هذه الاوضاع …اتمنى ان تتم مضاعفة حوافز الانتصارات في المباريات القادمة ..اضافة الى مضاعفة نثريات المعسكر والتمارين.
· القطاع الرياضي في الهلال عليه ان يجتهد ويقدم كل الحوافز والمغريات لعودة لقب الهلال المفقود.
· يا ريت التحفيز في الجولات القادمة يكون بالدولار.
· اصنعوا الفرق في كل شيء.
· لا تهاون.
· ولا استهتار.
· ………..
· ترس اخير : بكرة الفرح مستمر ان شاءالله
#الهلال_اليوم
